Sekar Alit "JARAT - KARU "

SEKAR ALIT "JARAT-KARU" *)

“Kekawian Saking Grya Batur Lebah Gablogan”

Olih - Ida Rsi Bhujangga Waisnawa Lingga Puja
Koleksi Pribadi - I Nengah Sumendra *)

Sekar alit niki kasuratang  , Saksat maka sundih ; Anggen sesuluh kahuripan ring jagat lemah  ;   utama rahat punang carita  ; 

“BRAHMANAJARATKARU”

Mungwing sari kumuda daging carita ; Ida Sang Jaratkaru sane sampun putus ring sanghyang
aji sastra , keni taler kebyaparan sedih kingking , rikala katemu den sang rumaga atma werdha irika ring ayatana desa , napike sane ngawinang ?

Kadi cecangkrimane ;

Sepenan pedidi twara tawang , nanging  sepenan anak tyos presida ngicalang ;

Maka kirang langkung daging saha suksmania , ledang nyangkepin sane kirang , munggelin sane langkung ;

Durusang wacenin lan telebang ;

Puput kawi-sastra olih ;

Ida Rsi Bhujangga Waisnawa Lingga Puja 

Grya Batur Lebah Gablogan Brembeng Selemadeg

PUPUH  SINOM  

1.     SINOM  ANGGEN  MURWA TEMBANG ;

Om swastiastu ;  para pamiarsa  sane singgihang titiyang ;  Maka pengawit anggen titiyang  mungkah lawang  punang carita  , sinom maka pemurwa aturang titiyang ;

ANGGEN  MENDAK SANGHYANG AJI ;

Lamakane  tan keneng tulah pamidi , presama purun ingulun angaturaken pemendak alit , melarapan sarining sebit sari , kesaksi dening sh.agni melejeg ring amoring kukus mendak palungguh ratu antuk pupuh sinom.

NGADEG LINGGA  RING HREDAYA ;

Asih dahating asih palungguh ratu , mehyang-hyang ring titiyang i-seka santhi  bedug jukung  , ajenek palungguh ratu ring hredayan titiyange  , ratu

SIDHA  METU  DADOS  MUNYI ;

Dumadak-je sweca memica waranugraha , umijil-aken sabda ayu , metu swara mangeresresin kayun sang mangrenge ; nika banget pinunas titiyange.

DADOS PUPUH KIDUNG SANTHI ;

Riwus sampun penugrahan palungguh ratu , lumaris hana metu punang carita , Jarat-karu , tan hana waneh , kaunggahang maring pupuh sekar alit

ANGGEN  MEKA  TURIN  SULUH ;

Dumogi , wenten raris anggen titiyang sesuluh , ngemarginin sesana kahuripan titiyange , iriki ring jagat lemah.

MENYULUHIN RING SARIRA

Anggen saksat penuntun , lamakne sida ngaweruhin swadharma risejeroning pemargi.

MANGE  UNING KANTUN WECI ;

Sumangdane titiyang eling ring dewek titiyange , kantun dahating weci , keliputan papa wighna tur klesa , tuna tambet pisan titiyang damuh palungguh ratu ;

WIREH  PANGGUH 

MARING  LAWAT  DURUNG  KEDAS

Napi malih mejanten , katon  maring lawat- titiyange , yukti dahating leteh pisan , nika te mahawinan , tunas titiyang penuntun druwene antuk sarin-sarin ajine ;

PUPUH  SINOM  ;

2.     KAGET  LAWAT  CENING  KEDAS ‘

Nah kene cening , mani puan kagiat katon , raris sampun nyalig melenyig anggan idewane cening , wit sangkaning sesuluh sastra ;

EDA  MALU  NGAKU  NYALIG ;

Banget pisan bapa nunas ring anggan idewane , eda rumasa den ragan idewane sampun kedas cening , depang anake sane ngadanin ;

WIREH  SUKIL  MANYELEHANG ;

Santukan dahating sukil pisan nyelehin kecuntakan ring angga , cening ;

KADI SEPENAN SANE CENIK ;

Yan inaragmayang bapa-te , cuntaka ring dewek ceninge , tan bina kadi i-sepenan sane alit , twara sida katon olih deweke pedidi , cening ;

TUSING NYIDANG MENYINGAKIN ;

Janten sampun kadi sesonggane cening , sepenan pedidi twara tawang nanging sepenan anak tyos to kecingak ; kawon pedidi-ne tan kerasa cening

BINA SATWAN  JARAT-KARU ;

Yan ambilang bapa maring plutuke cening , tulya kadi satwan Sang Jaratkaru ,

WIKAN PISAN DAGING SASTRA ;

Ida sang Jarat-karu , widagda , wagmi , wikan pisan risejeroning sastra aji , cening ; yan matahang bapa ngenikayang , nyalantara ida presida keswarga loka ;

MENGAJEGANG DHARMA LUWIH ;

Risejeroning ngamel kedharman ; tan sandang malih satwayang ento cening , wit sangkaning alit Ida sang Jaratkaru , ngelarang ke-dharman tur ulati pisan ;

PANGGIH SUNGSUT

NAPI SANE MENGAWINANG

Yan amonto-te keweruhan idane sang jaratkaru cening , taler tan sida lepas saking kayun sane kebyaparan , keni kedukaan rahat pisan , napike sane ngawinang , ngiring pelutin punang carita  

PUPUH  SINOM ;

3.     UDUH  CENING  SISYAN  BAPA

Nah cening sisyan bapa sane dahat sih  tresnain bapa – idewa ;

JALAN  PIL-PIL  SATWA SUCI ;

Saksat anggen  pedandanan  hurip , kadi sesuluh  rikalaning dalu , jalan pidartayang satwa pinih luwih turin mautama pisan cening ;\

JARAT-KARU   KANG  CARITA ;

Satwa sane  unggahang ritepengane mangkin , boyo wenten tyos ; satwan Ida sang Brahmana , meparab Ida Sang Jaratkaru ;

TULAD  TEMPO  TURIN  SIDHI ;

Satwane puniki ; Patut pisan  anggen tetuladan  rikalaning ngemarginin swadharma kahuripan dilemah ; cening ; saksat galihan padine  nesujati ; 

LANTAS  INGSAH MANIK GALIH ;

Sesampune sidha kepeik-petik cening , panggih raris galihannyane ; ngiring sane mangkin lanturang , umbah ingsah turin pilihin sarin-sarinnyane ;

TE-TAPININ  TURIN  DUDUK ;

Selanturnyane cening ; mangde yukti dados amertha hurip ; eda lali idewa napin-napinin , memilahang galih kelawan jalikan-nyabe ;

LAUT  RATENG  LANTUR  TUNAS ;

Sesampune tinemu ikanang galih ; ika ngaran  sarining tatwa mautama  , ento wawu raris rateng idewa ; antuk tri agni  ;  silih tunggil agni kewicaksanaan ;

NANGING  ALON  MANGUPININ ;

Nah nanging ; kadi pewarahing sanghyang aji ; alon-alon , dabdab risejeroning kayun , upin-upinin nasi dingine cening , mangde cening nenten keni sukak.

PANG  TEN  KEBUS

SADA GANCANG NGERAYUNANG ;

Lamakane tatan keneng panes bara  ; ayu purihnike tinemu ala ;

pelapanin turin  pretyaksa  ; nelebang risejeroning  manah  ceninge ; samangkana punang carita  Jarat-karu ; maka swar dalan sunia ;  ri-prewateking jana kabeh ;

PUPUH  GINADA 

4.     HANA TE SIRE  SANG  BRAHMANA

Manjing  punang carita ;  kawit  , wenten reke  sang rumaga wiku putusing jnana  ; utama luwih  ;  Ida Sang Brahmana  ;

JARAT KARU  LING   NING  AJI

Sugra pakulun , lamakane tatan keneng tulah pamidi  ; kadi purun presangga titiyang ngojah linggih Ida  ; mungwing aran idane   ; Ida  Sang  Jarat-karu ;

WELAS  ASIH  RING   LAKSANA

Yukti dahating mauttama  parilaksanan idane ngamel ke-brahmanan ; welas asih  tur  sayang pisan ring para janane sami  ,  rumasa maneduhin  pisan ;

PUTRAN  WIKU  DHARMA  SADHU

Ida mula tuwah kasunu putra  olih sang  sadhu dharma  ,  putran sang wiku ;

 

MAPREBAWA  PANGELEBBURAN

Saking embas Ida sang Jaratkaru ; mamuatang teja utama kadi prebawan  Ida Sh. Ciwa Rudra ; maprebawa  nakutin , nyejehin nanging  nayuhin ;

  

NENTEN  SIPI 

NGULIK  SARWA  DAGING  SASTRA

Mungwing  kawentenan Ida Sang Jaratkaru ; sabran  dina  - tan sipi-sipi  ida melajahang angga , tan surut2  ida  nelebang daging2 sastra sane mautama ;

PUPUH  GINADA  

5.     SERAHINA  MAUNUH  GAGA  ;

Taler  rikalaning  angamet ikang boga , melarapan maunuh gaga Ida Sang Jarat karu  ,  ngarerehin sisan-sisan pantune ;

MA-MUNDUHANG   MA-NGEDASIN

Seka akidik Ida mamunduhang , milpilang  galih-galihan unuh pantune  , lantur raris kasuciang  kakedasin , wawu   keratengang ;

KE-ATURANG  ANGGEN  YADNYA

Napi sane sidha kakeniang mawit sangkaning maunuh gaga ; 

nika kaunggahang anggen ida meyadnya  pinih  rihin sedurunge katunas ;

TALER  MAJENG  PARA  TAMYU

Dyapin akidik mikolihang ; nanging galihan unuhe punika taler keanggen nyanggra para tamyune sane ngerawuhin ring genah Idane  Sang jaratkaru

NIKA  JUGA  KERATENGANG

Sesampune  sida ida  me-yadnya lan  mepedana , wawu ida sane ngeratengang

  

PINIH  SUCI

LAKSANANE  TAN  PE-CEDA

Asapunika kaluwihan  swadharman idane  mepretingkah ring jagat lemah ; yan sliksikang ;  yukti - tan peceda Ida  ; sadhu dharma , turin suci laksana. 

PUPUH GINADA 

6.     SIANG DALU NGELAR YOGA

Lantur punang  carita ; lemah peteng Ida Sang Jaratkaru , nyambang Samadhi-ngulik sastra  ; ngarcana ring Ida Sh. Widhi  , ngerastiti bhakti tan pegatan ;

KANTOS LIPIA NGAMET ISTRI

Nanging ; kagiat kantos lipia Ida Sang Jaratkaru  ngamet  rabi

NENTEN LEKET RING KASMARAN

Tan keni kesemaran , tan sida kagoda olih Sh. Ratih ; santukan sastrane  saksat keanggehang  rabi ; amedang kecarum tan wenten kayun idane angamet istri ;

 

SIDA LUNGA  SEKITA KAYUN ;

Antuk kewikanan idane ; sepek risejeroning aji ; sekita kayun ida presida lunga , yadin ring jagat lemah kantos sida nyalantara ida lunga ring  atma loka

SIDI  UCAP  SARWA MANTRA

Uningayang titiyang  kawentenan Ida Sang Jaratkaru ; sidi sarwa ucap , mangan landep sarwa sabda , samangkana kawisesan idane ring angga ;

SAMI ASIH

SARWA DAGING JAGAT PADA

Antuk  kautmaan idane ; sami daging buwanane asih ; manusa asih - dewa sih , sarwa bhuta , bhuti – asih ; kantos sarwa tumuwuh sami pada asih ;

PUPUH DURMA   12A , 7I , 6A , 8A , 8I, 5A, 7I 

7.     CARITAYANG   JARATKARU  MALELUNGAN

Lantur punang carita ; mangke Ida Sang Jaratkaru lunga amarah desa

DOH PISAN  NGELUNGANIN

Mungwing lelungan idane ; dahating doh pisan , kije-ke ida lunga ?

NGELINTANGIN  DESA

Sepemargan idane sang Jaratkaru  ; sampun sayan sayan sawat saru ; ngelintangin desane ring jagat lemah ; sampun tan sidha kekatong malih ‘

KANTOS MARING  AYATANA

Kagiat ida rawuh irika ring  desa sunia , jagat suwung , kantos ring ayatana desa kewastanin , dijeke desane punika ; ngiring lantur punang carita ;

WATES SWARGA  NERAKA  IKI

Ayatana desa-ne punika , boyo wenten tyos ; wates  swarga kelawan nerakane ;

GENAH  SANG ATMA

Irika wenten kepanggih salu panjang  maka linggih  Sh. Atma ; mesandekan. 

MENYANTOSANG  PEMARGI

Manut ring tetujon  ngungsi sunia tawang ; irika sami prewateking atmane menyantosang pemargi ; santukan ayatana desane  wates swarga nerakane.

PUPUH DURMA 

8.     WENTEN CINGAK SANG PITARA SANE WERDA

Sesampune rawuh ida Sang Jaratkaru maring ayatana desa , kagiat tan pesangkan , dewaratu , kacingak wenten sang atma dahating werdha pisan

GOBO  UCEM  TURIN  MENYI

Indik prebawan sang atma punika ; ngawe sedih sang mengaksi ;  semu layu , gobo ucem , dekil turin  maong pisan

COKORNE  MEBANDA

menawi-te kebanda irika ring ayatana desa , cokornyane mategul ;

MEGANTUNG RING  PETUNG  IKA

Turin kepanggih megantung irika ; ring tiying petung sane akatih

SIRAH-NYANE  MANUNGKALIK

Uduh dewaratu ; nungkalik genah atmane sane megantung punika , cokornyane  metegul beduwur , sirahnyane beten , napi menawi iwangnyane ?

 

SOR-NYANE   JURANG

Malih ring sor tiying petunge punika , wenten jurang rejeng 

DALEM  NENTEN  KADI-KADI

Dalem tan kadi-kadi ,  melepuk agni  angabar-abar – kaliputin andus panes bara , tan sah ika kocapang ngaran  kawah  yamadiloka ;

PUPUH  DURMA 

9.     LAUT  CINGAK  BIKUL NGUT-GUT  TIYING  IKA

Malih ngeres-resin kayun sang Jaratkaru ; santukan ring sor tiying petunge punika , tan rerenan wenten i-bikul sane ngutgut -  akah tiyinge punika

SERAHINA  SAHA  KIDIK

Menawi tan kasuwen , meh-mehan pungkat I tiying petung , sawireh sabran lemah peteng  I-bikul  setata ngut-gut akahnyane seka kidik ;  

MEGENG MENENG  IDA

Nika te-mahawinan ; megeng meneng tan pebasa Ida Sang Jaratkaru

NGEMBENG-NGEMBENG TOYAN PANON

Manguritis ngetel tan rerenan toyan aksin Idane Sang Jaratkaru ,

MAPIKAYUN WELAS ASIH

Sedih kingking yukti Ida ;  turin raris metu kayun idane bepraya matulung ring sang atma sane kebanda  ; asih welas asih Ida Sang Jaratkaru ;

SUWE  TAN  PA-UCAP

Nanging suwe pisan Ida Sang Jaratkaru tan presidha ngawedalang wecana ,

LESU  MANAH TURIN SEDIH

ngaleson  sedih rahat  risejeroning kayun Ida Sang Jaratkaru ,  mengatonang kawentenan atmane asapunika ; napike sane ngeranayang ?

   

SEMARANDANA  ;   8I,8A,8O,8A,7A,8U,8A

10. JARATKARU SEDIH KINGKING

Lantur punang carita ; Ida Sang Jaratkaru saksat tan presidha ngentegang kayun ; mangurambyas toyan aksin idane tan pegatan , lambe getar , cokor ngejer ; sedih-sedih kingking ida ;

 

LAUT TAMPEK MENAKENANG

Kadi rumaksa ida raris nampekin sang atma, turin ; alon dabdab mapitaken , nakenang indike wenten kepanggih kebyaparan asapunika

 

UDUH ATMA  SANE WERDO

Manyulempoh-sada getar metu swaran idane ; uduh kite sang atma werdo !

AGUNG RNA  SINAMPURA

Astungkara ingulun presidha anemu kite ri-ayatana desa , nging agung rna sinampura , kadi purun mangkin titiyang ngemedalang pitaken ring jerone ;

 

NAPI  SANE  MAHAWINAN

Uduh jero-jero  sang atma , napike sane ngawinang kawenten jero asapuniki ? ledang ngenikayang ring sikian titiyang , jero sang atma werdo

GINANTUNG  RING TIYING PETUNG

Panggih titiyang anggan jerone sekadi mangkiin ; megantung metegul turin nungkalik iriki ring tiying petunge sane akatih , jero ;

KENI BANDA KEDUHKITAN

Sedih keni keduhkitan siang dalu ,  napi sujatinnyane sane ngawinang , wentene indik keni danda ageng , jero-jero sang atma

SEMARANDANA  ;   8I,8A,8O,8A,7A,8U,8A

11. JERIH TITIYANG MENYINGKIN

Uduh jero-jero sang atma ; sayang asih titiyang ring anggan jerone , jero

KANTOS BERAG AGIG  PISAN

Dados kantos berag agig , kantun wantah tulang kekaput kulit anggan jerone

SIR-SIR ANGIN  BARET  REKO

Taler ; dandan sang marutsutha ring anggan jerone tan pegatan ; kiberang angin baret  lemah peteng jero , kelayang-keluyung irika ring duwur tiyinge

SUWE NENTEN NGERAYUNANG

Yan asapuniki te- kawentenan jerone ; janten suwe pisan tan wenten , sentanan jerone ngaturang bubur sasuru , tan wenten sane rungu

WANTAH  WIDUH  NE-GELEKANG

Uduh jero sang atma ; menawi lipian sentana druwene , punapiang titiyang mangkin mapitulung ring anggan jero , wantah widuh sane gelekang jero.

NENTEN WENTEN  MAPITULUNG

Jero sang atma werda ; ledangang mebawos ; menawi sidha antuk titiyang nulungin anggan jerone , mangde linepas saking danda utpata ;

SAYANG JENGAH MANAH TITIYANG

Rasa penelas sayang titiyang , ngantenang  jero sang atma  sekadi mangkin , jengah titiyang , paran kite mangke , apa pinerih te kite sang atma ri-mami.

SEMARANDANA  ;   8I,8A,8O,8A,7A,8U,8A

12.RASA  RES-RES  TITIANG  NANGIS

Lara ngares-resi tangis , sedih kingking manah-ning ulun ; sinambi metu pikayunan sane jengah , ngantenang kewentenan atmane keni kesengsaran ;

MANGKIN TITIYANG MAPIOLAS

Rengen te sang atma werda kite ; aja  sumenangsaya ;  mangke ingulun sang Brahmana Jaratkaru , welas mahyun  matulung angruwat kang sarwa papanta ;

PACANG NULUNG  ANTUK  LASYO

Uduh dewa sang atma werda ; jengah yukti titiyang ; nirdon titiyang ngelarang ke-brahmanan ; lasya titiyang mangkin pacang ngupepire anggan jerone.

MOGI SIDHA  NUNGKAP SWARGA

Lamakane sida angungsi sunia tawang ; kulihe kite maring swarga loka 

NENTEN  KARI  KESENGSARAN

Mangde sampunang kari , kakekep ring ayatana desa , linepas sarwa duhkita

POLIH  GENAH  DIRGAHAYU

Nging ; lamakane sida amangguh-aken swarga  , aja kite anut dalan maring neriti , dalan maring ersania tuten denire ;  kaja-kangin pemargan idewane ;

NGAYAH  MARING  SIWA LOKA

Pengaptin titiyange matulung ring anggan dewa sang atma ; dumadak-je  presidha kantos masikian irika ring ciwa loka , nyadpada ring kawit mulanta.

PUPUH  GINANTI ; 8U, 8I, 8A, 8I, 8A, 8I

13.RARIS  ATMA NYAWIS  LAUT

Riwus sampun puput wecanan sang Jaratkaru , laut kecawis olih sang atma

KENAK KAYUNE PREMANGKIN

Parama ledang risejeroning kayun sang rumaga atma , rumasa kenak pisan

KADI POLIH TIRTHA MERTHA

Tulya kadining kesiratin amertha sanjiwani , pangandikan ida sang jaratkaru ; presida  nangiang kayun sang atma sane werda punika 

PENYAWISNE ALON MANIS

Raris digelis , sada ngejer lamben ida sang atma , ngemedalang bebawosan mejalaran antuk alus , manis turin dabdab alon ,

UDUH  CENING  SANG SUJANA

Uduh cening sang brahmana luwih  ; astungkara jeng bapa sida kacunduk kelawan anggan idewane , angayu-bagya pisan bapa cening ;

LUWIH  SADHU  KAYUN  CENING 

Yukti dahating luwih kerthi anggan idewane cening , mahyun matulung ri-jeng bapa , angeruwat utpata dandan bapa-ne ; parama-suksma pisan cening

PUPUH  GINANTI ; 8U, 8I, 8A, 8I, 8A, 8I

14. SEDURUNGE  CENING  NULUNG

Nah nanging , wenten bawos jeng bapa ring anggan ceninge , sedurung cening mapitulung ring anggan bapane  , sire sane tulungin idewa buka jani ;

WENTEN  TUTUR  BAPA  KIDIK

Deleng cakupan karo kalih bapane , sematra tutur bapane ; pirengang cening ,

INDIK KULOWARGAN  BAPA

Pemekas sane bawosang bapa boyo wenten tyos indik kulowargan bapane

MARING  JAGAT  DUKE  NGUNI

Nanging sampunan cening salah penampen , kawentenan bapane duke kantun ring lemah tulis , duke kantun bapa mahurip ; cening ;

MAKA  SAMI  NGAMBEL  SASTRA

Kesujatiane bapa ; penyapsap sh.aji cening , bapa mepedandan antuk taru berghu , mesekar sarasija , meanting-anting antuk wira lingga ;

SAMI  WIKAN  TURIN  ASIH

Boyo bapa amuji-muji dewek , cening ; bapa sang brahmana , wikan widagda dening sastra aji , asih riprewateking daging buwana , nanging keni kebyaparan buka mangkin , napi sane ngawinang ?

PUPUH  GINANTI ; 8U, 8I, 8A, 8I, 8A, 8I

15. SAMI  BHAKTI  RING  LELUHUR

yan indik bhakti ring para leluhur , tan surud-surud  siang dalu ,  bapa ngarcana ; cening , mangrastiti bhakti ring widhi ring leluhur maka sami ;

MELAKSANA SETATA BECIK

Rumasa risejeroning laksana , taler ngutamayang tri kaya parisudha-ne  , tri hita karanane  anggen bapa  tali pedandanan hurip , cening ;

METEDUNG RING SANGHYANG DHARMA

Yan inargamayang bapa anggan bapane duke kantun mahurip ; tulya sanghyang dharma anggen bapa tedung sabran rahina , cening

MECARMA  BAN-SASTRA  AJI

Sanghyang sastra anggen bapa rumasat saput kulit bapane , cening  ;

MEWASTRA  BAN-JAPA  MANTRA

Taler tan sah  kampuh wastran bapane mepirig  antuk japa mantra , cening

MEKALUNG  BAN GANITRI

Mekalung antuk genitri , magelang upawita ,  madestar sirowisto , maselimped dening  catur wedha , asapunika kesujatiane bapa duke malu , cening ;

PUPUH  GINANTI ; 8U, 8I, 8A, 8I, 8A, 8I

16. ADA PANGGIH  BAPA  UNDUK

Uduh cening sang sadhu , ada unduk panggih cening bapa megantung iriki ring tiying petunge , kebasta nungkalik keni kebyaparan kingking ;

KESENGSARAN  BUKA  MANGKIN

Kaliputin kesengsaran tan pegatan , keni utpata danda , becikang idewa miragiang , napi kesujatiane sane ngeranayang bapa asapuniki ;

WIREH   PUTUNG  RING SENTANA

Boyo ulah karma ulah laku salah ulah , cening ; wantah lacur bapane tan mederbe sentana , sane ngelanturang purus bapane dilemah ; putung bapa ning

BAPA  NGELAH  PUTRA  ASIKI

Bapa mederbe putra wantah asiki , okan bapane mapregayan lanang

SAKING  ALIT  NGELAR  YOGA

Nanging ; saking alit putran bapane sampun nelebin sastra-sastra aji , tan sipi-sipi ngelarang yogo semadhi , kantos lali angamet pawong istri ;  cening  ;

MENGAJEGANG  BRAHMACARI

Kadi sesonggane ; ayam mati gintel lipan  ; ayam ngaran yama niyama berate , lipan ngaran lipia ; lipia tekening sesana ; wireh sastra saksat anggen rabi  

 MAS-KUMAMBANG ; 4A-8I-6A-8I-8A

17.  PIANAK  BAPA ; TUSING  KAYUN  NGALIH  RABI

Asapunika kawentenan bapane duke malu ; tan keneng kesemaran okan bapane , tan mahyun ngalap rabi ;

BAPA  PUTUNG NANAK

Nika sane ngawinang putung bapa , tan mederbe cucu , kumpi pegat sentana

ENTO NGAWI  BUKA  MANGKIN

Wenten panggih buka mangkin ; sire sane ngelintangang bapa , cening ;

MABELASAN  RING PITARA

Tan presidha bapa matunggilan kelawan para leluhur bapane sane sampun ngeluhur ; wireh tan wenten sane ngemargiang pemerasan bapane , cening ;

MAS-KUMAMBANG ; 4A-8I-6A-8I-8A

18. KADI  RASA ; RING NERAKA  JATI  CENING

Napi san kerasa antuk bapa ritepengane sane mangkin , yukti-yukti sengsara pisan , cening

GELO-GELO  PISAN

Hidup boyo mati tidong ; kagelo-gelo pejalan bapane cening

RASA  SEDIH  NENTEN SIPI

Tan sidha yukti bapa ngelintangin ; kebyaparane ; sedih tan sipi bapa ning

TULUNG BAPA TULUNG  NANAK

Menawi sampun jatukarma , anggan cening ngeruwat dandan bapane  ; tulung-tulung bapa cening tulung , mangde sida bapa lepas saking iriki ;

MAS-KUMAMBANG ; 4A-8I-6A-8I-8A

19.  MANGDE  LEDANG , CENING  MANEKEDANG MUNYI

Wenten pinesarat pisan bapa ring anggan cening ; mangde-je presidha cening nekedang munyin bapane ping-kalih satwayang unduk bapane mategul dini ;

 

MARING PIANAK BAPA

Pemekas banget bapa mapitunas , olas asih idewa nekedang ring okan bapane

MADAN JARATKARU  CENING

Cening ; Mungwing pianak bapane ditu digumi sekala , ida meparab Jaratkaru

MANGDE RAWUH NYINGAK BAPA

Sapunapi je antuk idewa mangde bebesen bapane , presida nganteg ring okan bapane , turin digelis aturin okan bapane rawuh nebusin bapa ;  cening ;

MAS-KUMAMBANG ; 4A-8I-6A-8I-8A

20. MADAK IDA  ; KAYUN GELIS  NGAMET ISTRI

Pengaptin bapane cening ; dumadak-je kayun Ida Sang jaratkaru putran bapane ; maprewerthi nitenin angga , ngalih anak istri keanggen rabi ;

TURIN  NGELAH  PUTRA

Napi men malih cening , mula tuwah tetujon anake lingsir , mangdeje wenten sentana , satmaka  penyegjeg ring kulowarga ;

APANG  WENTEN NYAMBUNG HURIP

Lamakane tatan putung , tan pegatan ; sida raris nyambungang warih ;   

WANTAH  NIKA NE-MENYUPAT 

Wantah nika sane sujati presida ngater anggan bapane , nyupat sarwaning kebyaparane , presida ngelintangang saking ayatana desa ngungsi pitralokane ;

( sambung antuk palawakya )  ;  uduh cening sang sadhu dharma , rengen pewarahing mami ,lamakane sida pwasire weruh ;

tatan hana pahi mami lawan ikang agawe papakarma ; si manghidep sengsara ; kunang yan kite tuhwasih ikang wiku Jaratkaru ngarania ; pinta kasihi ta ya  kon manaka ; ya ta nyan kami mulihe maring  pitri loka ;

GINADA ;  8A , 8I, 8A, 8U, 8A, 4I, 8A

21. RIWUS PUPUT ATMA NABDA

Punggel ikanang carita , riwus sampun puput sang rumaga atma mangandika ;

JARATKARU  LINTANG SEDIH

Kagiat tan pesangkan ; prebawan ida sang Jaratkaru ; kadi giri kesaputin dening sayong , rem-rem ucem mati semita , layu dudus prebawan idane ;

MANYULEMPOH NGAKEB TANAH

Ngares-res tangis , sedih kingking Ida Brahmana Jaratkaru , turin manyulempoh--dewaratu ; mekakeb ring garbaning pretiwi ;

LAMBE NGEJER  TUR  MA-NGUNTUL

Manguritis sabeh toyan aksin ida sang Jaratkaru , maruntutan lambe geter turin manguntul , rumasa mangerenge swaraning tatit rikalaning kerahinan.

MANEKEPIN  PRABUN  IDA

Rumasa jengah sedih sane ngeliput risejeroning kayun Idane , rrais katekepin prabun idane antuk tangane maka kalih , napike sane ngawinang asapunika ?

SENGI-SENGI

SUWE  MENENG  TAN – PE  NGUCAP  

Rasa tan reranan ngurambyas toyan waspan idane ; ulung ngetel turin kantos  melusin  sithi darani , sedih dahating sedih , ida meneng tan peucap

GINADA ;  8A , 8I, 8A, 8U, 8A, 4I, 8A

22.AMPURAYANG PISAN  TITIYANG  AJI

Lantur mangkin sang Jaratkaru mapaungu atur ring sang rumaga atma ; agung Rna sinampura titiyang palungguh aji , aksi pengaksaman titiyange aji ;

TITIYANG  SAMPUN  OKAN  AJI

Puputang pengendikan ajine , tan presidha titiyang miragiang malih aji , titiyang sampun sentanan ajine , titiyang putran ajine  , Jaratkaru titiyang aji

JANTEN  AGUNG  DOSAN  TITIYANG

Presamya dahating  agung dosa , titiyang manumadi , iriki ring lemah tulis aji ;

TITIYANG WANTAH  NGULUR  KAYUN

Tan kapikayun yukti antuk titiyang , aji mangkin  nampedang keiwangan titiyange ; setata titiyang ngawe seneng pedidi , ampurayang sikian titiyange

SIANG  DALU  NGELAR  YOGA

Santukan rumasa mabener sikian titiyange aji , lemah peteng tan reranan ngelarang yogo semadhi , kantos lali titiyang tekening swadharman titiyange

KANTOS  LALI

MENGAYUNIN  KULOWARGA

Nika te mahawinan ; saksat sastrane anggen titiyang rabi , lali titiyang ngayunin kulowarga ; bes - - ngeliwat kepingon yukti sikian titiyange ;

GINADA ;  8A , 8I, 8A, 8U, 8A, 4I, 8A

23.YENING  NIKA  NE-NGAWINANG

Uduh aji rumaga langit titiyang anggan aji ; yaning wantah nika-te sane ngawinang aji ngemanggihin kesengsaran sekadi asapuniki , aji ;

WAWU  MANGKIN  TITIYANG  ELING

Premangkin titiyang wawu saksat ketangiang  rikalaning titiyang sirep, aji

RING SESANA  DADOS  PUTRA

Ndikapan malih titiyang maparilaksana tinut tekening pewarah aji , sesanan sang suputra mula tuwah angawe moksartham jagadhita ring kulowarga ;

GELIS  PUPUT  MAPIKAYUN

Tan kasuwen punang carita ; mangke ingulun sang Jaratkaru wus puput anunggilaken jnana sandhi , sampun puput antuk titiyang mikayunin aji ;

MANGKIN  TITIYANG  MENGIRINGANG

Sampunang aji kantun sedih mapikayun , cutet titiyang ngiring kayun ajine

 

NGALIH  RABI

BRAHMACARI  NE-KA-LEBAR

Rasa dangan antuk titiyang aji, mangkin titiyang pacang mewali ring lemah tulis , bepraya angamet pawong istri listu ayu , angelebar ikanang brahmacari ;

GINADA ;  8A , 8I, 8A, 8U, 8A, 4I, 8A

24. SAMPUNANG  PISAN  SANGSAYA

Sedurunge titiyang digelis mewali aji , wenten atur titiyang ring linggih aji , sampunang aji sumengasaya ;

NANGING   AJI  MANGDE  UNING

Tyos den asapunika , becikang pisan aji miragiang ; mangde aji tatas uning

 

SANE  PACANG  REREH  TITIYANG

Sapunapi-ke titiyang pacang ngalebar brahmacarin titiyange , sire sane ruruh titiyang pacang anggen titiyang rabi , mangde aji nenten iwang penampen ;

TITIYANG  NGALIH  ARAN  PATUH

Titiyang ngalih rabi ; mangde polih arane pateh ring sikian titiyang , sang rumaga istri sane meparab Jaratkaru ; samangkana ling sang Jaratkaru , bepraya lumampah te-sire meta-istri  senama-nire ;    

MANGDE  NENTEN  TITIYANG  TUNGKAS

Tetujon titiyang boyo wenten tyos ; sumangdane sida kadi pewarah sanghyang aji , tunggil ingaran pateh , sama pada jayanya ; kantun brahmacari , siki anggan titiyang ,  nanging sida ngawetuang sentana ;

 

KAYUN TUNGGIL

PAWIWAHAN  PARIPURNA

Asapunika satyaning wecanan titiyange ring linggih  aji , mangde ledang aji memica penugrahan tur digelis titiyang mikolihang  istri , paripurna labda karya , metu sentana lewih , sida nyuoat kesengsaran ajine ;

PUPUH PANGKUR  ;  8A-10I-8U-8A-12U-8A(7A)-8I

25. SAMPUN  PUPUT  BEBAWOSAN

Lantur  kapidartayang  carita Sang Jaratkaru , risampun puput mebawosan  ;

JARATKARU  GELIS  PAMIT  MEWALI

Tan kasuwen malih ida irika ring ayatana desa , digelis raris mepamit mewali

NGALIH  ISTRI  ARAN  PATUH

Kagiat tan kewarnanen punang carita , jumujug rawuh maring bumi sayana , rawuh sampun ring  jagat sekala ; digelis Ida  maprewerthi angamet istri ;

KEMO  MAI   MANYELEHANG

Pemargan idane ngelantur amarah desa , ngider gumi sami kaselehin ;  ngalor ngidul mangulon mangetan  , ngerereh anak istri sane meparab Sang Jaratkaru

 

SAKEWANTEN ;  NENTEN  POLIH  MANUT  KAYUN

Nanging kasuwen risepemargan Ida Sang Jaratkaru , ten presida ngeniang manut ring tetujon , kantos lemes lesu ida menyelehin , durung presida katemu ;

KIMUD  JENGAH  MARING  ANGGA

Iriki metu raris kayun idane jengah ten kadi , kimud tekening kawisesan ring angga , ngalih anak luh asiki twara polih , nirdon kediatmikane kerasayang ;

BINGUNG  KAYUN  MENGAYUNIN

Tan sida ketambarin ; Jaratkaru tulya  kadi ; sesapi ring tengahing guwa ; pati-kaplag pati-kaplug , bingung  ida mengayunin , dija-ke  ngalih jaratkaru istri ;  

PUPUH PANGKUR  ;  8A-10I-8U-8A-12U-8A(7A)-8I

26. JARATKARU  MARING  LAMPAH

Kacarita risepemargan Ida Sang Jaratkaru ; angentap maring dalan agung ;

NGUNGSI  ALAS ;  MADURGAMA  TURIN  SRIPIT

Pelelungan idane sane mangkin , wantah ngungsi alas sripit sane dahat madurgama , napike sane ruruh idane ring tengahing alas  ?

BRANGTI  IDA  GELAR  GELUR

Riwus napak aling-aling alas ; wates jurang rejeng tukad sengka , dahating brangti ida Sang Jaratkaru ulihan jengah , irika ida lumaris ; gelar-gelur ; 

LAWUT  NEGAK  TUR  MESILA

Tinemu silacala watu lempeh ring sekak jurange punika , irika ida asila pened ;

MANGELARANG  YOGO  NAMASKARAM  IKU

Santukan kewikanan idane dahat mautama ; premangke anunggilaken bayu sabda idep , Ida anangun yasa kerthi  , ngelarang  yogo namaskuru  ;

NGUNTAB  PARA  DEWA  DEWI  

Risampune sregep sana-lingga Ida Sang Brahmana Jaratkaru , raris  anguncaraken wedha pengaradan ; anguntab prewateking dewa-dewi kabeh.

PUPUH PANGKUR  ;  8A-10I-8U-8A-12U-8A(7A)-8I

27. SAMI ATAG  ISIN  ALAS

Mejalaran panelas kayun Ida Jaratkaru , aminta sih tulung ri-prewateking sarwa daging alase maka sami , sami keatag antuk kediatmikan idane ;

SARWA PRANI  , SAMAR  GAMANG JIN  MEMEDI

Sekancaning sarwa mauruip , sarwa samar , jin , memedi saha para dedemit
 

SETAN ALAS  PADA RAWUH

Wenten i-buta jurang pangkung , setan alas , pisaca-pisaci ,durbala-durbali , sekancaning buta-buti ; sami pada nungkul rawuh menangkil ring ida ;

MEGENJONGAN  TANAH ALAS

Geter lindu ikanang buwana , genjong kang pertiwi , alase kadi katibenin lindu agung , angin ngelinus , sarwa tumuwuh kantos bun kadi hidup premangke.

SWARA  RAMYA  MEKALUKAN  MANGERUDUG

Malih maruntutan ramya gumuruh ikang swara , alilit-lilit tatit swaraning giri , ngerudug  metalutan saling candetin swaran burone , dewaratu …………..

 

SARWA  BURON  PAKSI  JUGA

Gelar-gelur swaran ipaksi gagak , kadi anake mewangsit riprewateking sarwa paksine makejang , asapunika taler swaran i-ratun alas ; mewarah-warah ;

 

SAMI  RAWUH  PADA  NANGKIL

Saksat kadi i-uled tikeh , premangkin sareng nangkil ring Ida Sang Brahmana , tan wenten sane purun tempal , sami pada rawuh angaturaken panganjali.

Lumaris mangandika ida Sang Brahmana jaratkaru riwatek isin alase ( ucapang antuk palawakya ) ;

ih kite sakweh-te sarwa bhuta , stawara , jenggama , pinaka awak-te ; ----------- ingulun sang jaratkaru aranku , brahmana mahyun  maistri ; --------- wehen te hulun  istri senama-ning hulun , mengaran sang jaratkaru - juga ; --------ulah te sidaning  don  metu  suputra ;----------- yan sayogya pinaka-ning hulun ----------- ya ta nyan molih-aken swarga kawitang-ku ;

PUCUNG  ;  4U-8U-6A-8I-4U-8A

28. SAMPUN PUPUT  ;  NGELAR  YOGO JARATKARU

Gelis punang carita ; sepuput ida sang  angelaraken yoga namaskuru  ;

TANAH MESIBAKAN

Kagiat  katon kang pretiwi tala , engkag masibakan tanah alase ;

GENJONG  JAGAT  HUJAN  ANGIN

Kadi karuntuhin parwata cala ikang giri , maruntutan malih antuk hujan angin

KAGET METU  ; NAGA BASUKIH  SANE  MEDAL

Karenge swara ngos-ngosan nakutin pisan  ,  kagiat metu ikang naga-raja , Ida Sang Naga basukih , kiniring dening prewateking dada-pada mekabehan ;

PUCUNG  ;  4U-8U-6A-8I-4U-8A

29. SABDA  METU , MADULURAN  NGULUN-NGULUN

Egal-egol  se-pemargan Ida sang naga basukih ;  sinambi mesabda a-ngulun-ngulun , kadi swaraning sangka kala ;

 

TEJAN  SURYA  KEMBAR

Uningayang titiyang indik prebawan ida sang nagendra=raja ; teja tulya kadi surya kembar , nyemporong  ; ngawi ajerih sang sane maneleng ;

IKUTNYANE  MANGERINCING

Napi malih mangrenge swaran siksiknyane ; kadi sayuta gongseng wesi , maweweh kumarancang-kumerincing - swaran ikutnyane magejeran  ;

 

BAWA AGUNG  ; MAGELUNGAN  SARWA  ENDAH

Ida mabawa antuk  sarwaning sesocan mirah , pekebyah-byah ; sedaging buwanane tan wenten purun presangga , samangkana prebawan  Naga Basukih

PUCUNG  ;  4U-8U-6A-8I-4U-8A

30.  SAMI  NGUNTUL  ;  ISIN ALAS  PADA NGUNTUL

Antuk keluwihan wibawan ida sang naga Basukih ; sami sekancaning daging alase , tan jwari macendatan , sami pada manguntul rep-sirep sepi litig  ;

MANGANJALI  SEMBAH

Asapunika taler ; sami pada ngaturang penganjali sembah bakti ring ida ;

PIYAK  SINGLAR  SARWA  MENTIK

Napi malih i-sarwa tumuwuh ; piyak singular masibakan kadi  pager wetis ; tan hana purun anyengakalen sepemargan idane sang naga Basukih ;

PAKERUYUK  ;  AYAM ALAS MANGIRINGANG ;

Sami angob seneng ngatonang ;  mangiringang sepemedal ida sang nagaraja , pakeruyuk i-keker ngaturang swasti prapta , mawedha juga i-tamulilingan.

PUCUNG  ;  4U-8U-6A-8I-4U-8A

31. JARAT-KARU  ;  NAPI  SANE  MERIH  KAYUN

Risampun kacunduk sada arep Ida naga Basukih kelawaning sang Jaratkaru ; metu lingning sabdan Sang Naga Basukih  ; Nah cening sang brahmana Jaratkaru anggan idewane ; tumben jani idewa ngatag sarwa daging alase maka sami , napi pinerihang idewa ne sujati ?

SAMPUN  NIRE  TATAS

Sekancaning pikayunan idewane , sampun sujatinnyane manire ngewikanin

CENING  KAYUN  NGAMET  RABI

Tan sah risepengaptin idewane ; wantah nunas tulung ngalihang rabi  ; kesohor kewikanan idewane , ngalih rabi abesik  , twara presidha

ARAN  PATUH ; JARATKARU  ISTRI   IKA

Sami bapa sampun uning tekening kayun idewa ; idewa ngalih rabi , apang polih arane patuh kelawan idewa ; madan Jaratkaru jua  ;

PUCUNG  ;  4U-8U-6A-8I-4U-8A

32. EDA  TEKEJUT  ;  ANE  MADAN  JARATKARU

Uduh cening sang jaratkaru ; eda pesan idewa tengkejut miragiang wecanan mamine ; becikang-becikang mangrenge ; cening

SANG  NAGINI  IKA

Sane madan Sang Jaratkaru boyo wenten tyos, wantah Ida Sang Naga Nagini

NANGING  MARUPA  LELIPI

Nanging lacur anggan idewane ; sane ruruh idewa amarah desa ,  Jaratkaru istri merupa hula-raja cening , boyo merupa manusa  ;

RAIN  INGSUN  ;  KENKEN  CENING  YENING  KETO ;

Buine mangde idewa tatas ; Sang Naga Nagini , nika  wantah rain bapane , cening ; men-kenken jani anggan idewa , mapan sane budiang merupa lelipi , purun idewa pacang nganggen rabi ;

DANG-DANG  ;  10I-10A-8I-8U-8I-8A-8U-8A-12I-8A

33. TAN  KEMENGAN  JARATKARU  RARIS  MATUR  SEMBAH

Pasang tabe , Ida Sang Naga basukih ; matur suksma rahat, ingulun sida anemu sang Jaratkaru istri , tan makirig atampak titiyang ngetohin satya ;

MENGUNINGANG SAKING  SATYA

Wireh mula tuwah jatu-karman titiyange katemu sareng i-rai Naga Nagini

SANE  PACANG  KATINDIHIN

Sampunang-je merupa hula , merupa lelipi ; saksat kadi uled yaning sampun madan Jaratkaru ; janten nika tuwah mula sane tindihin titiyang  ratu ;

ARAN  ISTRI  JARATKARU

Sampun panumaya sane mangkin , angayu bagya pisan titiyang sida kacunduk ring rabin titiyange senama kelawaning ngulun Jaratkaru ;

TITIYANG  SATYA  LAKI  RABI

Sampunang sumengsaya ratu ; titiyang mesatya ngelarang laki rabi ring rain palungguh ratu , dyapin merupa hula-raja  ;

WIREH  TITIYANG  SANE NGEMBAN

Santukan titiyang angamet rabi , boya anggen anak tyos , wantah titiyang sane pacang ngemban serahina wengi ; titiyang sane uning kawon becike ratu ;

SAKING  TUWAS  MANUT  KAYUN

Tan sandang ratu was-was ring sikian titiyang , cutet sampun manah titiyange

MANGDE  MEDAL  SANG SU-PUTRA

Tetujon titiyang , lamakane sida umijil-aken suputra , mederbe titiyg sentana

UDUH RATU  ; NGIRING  GELIS  MA-PREWERTHI

Singgih ratu sang Naga Basukih ; napi men malih ; ngiring digelis maprewerti , pendak-pendak rain titiyange Ida sang Jaratkaru istri  ;

RAIN  IDA  TUNAS  TITIYANG

Mangde ledang palungguh ratu nibakang penugrahan ; kesaksi Sh. Tryodasa-saksi ;  rain palungguh ratu , mangkin tunas titiyang anggen titiyang rabi ;

DANG-DANG  ;  10I-10A-8I-8U-8I-8A-8U-8A-12I-8A

34. SANG NAGINI MANGANJALI  MATUR  SAHA DAB-DAB

Lantur ikanang carita ; sepengrawuh naga nagini , manyulempoh malingkehan , ngaturang penganjali pangestu  , ring sang Jaratkaru ;

BELI  JARATKARU  SAYANG

Uduh pasang tabe , lamakane tatan keneng tulah pamidi , titiyang beli ;

MANGDE  SAMPUN  BELI  SEDIH

Sedurunge ngelantur idep beli ring sikian titiyang beli ; kayun-kayunin becikang pisan , cingak goban titiyang beli, mangde tan marisel-sel ring unduk ;

GOBAN  TITIYANG  NENTEN  MANUT

Sampun beli pawikan , tan anut goban titiyang ring anggan beli , titiyang merupa hula , beli merupa manusa ; boyoke tan kawenangan ;  beli ;

KIMUD  TITIYANG  MAJENG  BELI

Jengah kimud titiyang mesanding sareng anggan  beli ; sampunang beli nyuwang sikian titiyang , pucehang kayun beline – beli  ; 

NAPI  MALIH  BELI  WIKAN

Napi men pwaran titiyange , yaning kantos beli ngambil sikian titiyang dados rabi , menawi dados kekedekan gumi anggan beline ; kayunin becik beli ;

WICAKSANA  DHARMA  WIKU

Beli sang widagda sastra , beli sang wiku putus , titiyang raris lelipi , sampunang beli lali manut sastra , boyoke niki mewasta  , salah timpal ;

KANGEN  MANAH  MEDAMPINGAN

Ampurayang pisan sikian titiyang  , titiyang ten purun merabi sareng beli

LEDANG  BELI  ; MAPIKAYUN  SANE  BECIK

Sampunang beli ngemenggahang kapiduka ; waliang kayun beline , ruruh anak tyos beli , mangde pantes mesanding kelawan anggan beline ;

APANG  TUSING  MASEL-SELAN ;

Cutet ampurayang titiyang beli , mangde sampunang beli mari selsel kawekas

DANG-DANG  ;  10I-10A-8I-8U-8I-8A-8U-8A-12I-8A

35. BELI  JARATKARU  SANE  KESINGGIHANG TITIYANG ;

Uduh beli Sang Jaratkaru , sane singgihang titiyang anggan beline – beli

 

TITIYANG  WANTAH  MAKELINGIN

Kadi purun presangga , titiyang mejagra budi ring anggan beli , beli bagus

GAMYA  GEMANA  NE-KAYUNIN

Yaning beli merabi ring titiyang ; elingang pisan beli ‘ indik uger-uger agamane ; gamya gemana salah timpal , ngaletehin jagat anggan beline ;

MANGDE NENTEN  BELI  MURUG

Nika mahawinan , mewanti-wanti tgitiyang nunas ring anggan beli , sampunang beli mamurug , mangde nenten dados kekedekan gumi  , beli ;

KENA  TEMAH  DENING  WIDHI

Ring niskala , janten ajerih manah titiyang ; keni danda utpata anggan beline

YAPIN  SIDHA  MEDAL  PUTRA

Indayang becik-becik kayunin rihin beli , dyapin sida ngawetuang  putra , nanging tan manut dening uger-uger agamane , kimud manah titiyang ,beli

NAPI  DADOS  PUTRA  IKU

Napi-men menadosnyane putran beli-okan titiyang ; wireh metu sangkaning salah timpal , janten i-oka pacang ngawe letuh ikang rat ;

SALAH  RUPA  SALAH  IMPAL

Ayu purihnika tinemu ala ; meh-mehan salah wetu – salah rupa sentana-ne  riwekas beli , becikang pisan beli ngayunin indike puniki ;

BOYO  NAGA , BOYO MANUSA  ANAK  ALIT

Napi minab pengembasan okane riwekas ; rupania menawi tawah pisan , boyo merupa lelipi , taler boyo merupa manusa , kayunin atur titiyange  ; beli

TUSING  BISA  MENGADANANG

Janten sami pacang nemu kebyaparan ,yaning beli murug nganggwang kite ;

Titiyang kimud ring sesana , beli dados kekedekan gumi , putrane taler salah wetu , gobo tawah , tan bisa ngadanin – nto beli ;

PUPUH SINOM  ; 8A,8I,8A,8I,8I,8U,8A,8I, 4U,8A

36.  LANTUR  MANGKIN  PIDARTAYANG

Para pamiarsa ---- , ngiring lantur midartayang satwan Ida Sang Jaratkaru ;

JARATKARU  NE – MENYAWIS

Riwus puput Sang Nagini mapaungu atur , raris kecawis olih Ida sang J.karu

UDUH  ADI  SANE  SAYANG

Uduh adi – adi ayu mas mirah beline adi , sayang pisan beli tekening adi ;

EDA  ADI  SALAH  TAMPI

Nanging , sampunang idewa salah penampen adi ; pirengang bawos beline

MAKA  SAMI  BELI  UNING

Napi sane kawedar adi , sampun beli ngamel , sami beli sampun tatas  adi ;

TUTUR  ADI  WANTAH  PATUT

Yukti pisan adi ; akatih tan wenten iwangnyane , atur idewane sami twah patut , banget beli nyuksmayang pisan pikayunan adi-ne ;

BELI TUSING  PACANG  NGAWAG

Nanging ; adi sampun pawikan ring kawentenan beline buka jani , beli sang wiku putus , janten tusing ngawag beli melaksana adi , boyo ulah laku ;

BELI  PACANG  NYUPAT  ADI

Uduh sang ratna ayu Diah Nagini ; Sedurung beli mawiwaha kelawan idewa ; ayuwa sumenang-saya , mami bepraya linepas-aken nahan tangis pwa-sire, beli wenang ngelukat adi ; wireh beli weruh ri-kedaden-ta duke nguni ;

 

RUPA  AYU

DADOS  ANAK  BAJANG UTTAMA

Nah adi Diah Nagini ; anti-akena ; ingulun Brahmana Jaratkaru , bepraya angusta lingga - diniksa pwa-sire den Agni-Sara ; nyuti rupa mewali kadi rupanta mula ; dados anak bajang lewih mautama  , adi-adi sang jegeg  ; 

PUPUH SINOM  ; 8A,8I,8A,8I,8I,8U,8A,8I, 4U,8A

37.                      NANGING  PATUT  ADI  TATAS

Adi sang ayu ; Diah Nagini ; tatas becik adi  nampi pengendikan beli-ne adi

ADA SUMPAH  BELI  ADI

Sedurung mewali rupan adine dados anak luh luwih mautama , wenten maka sumpah alaki-rabin beli ring anggan idewane ; telebang pisan adi ;

JALAN  SATYA-NE  GELARANG

Pengidih beli wantah asiki adi ; satya lakeng rabi-ne jalan tohin , ento jalan anggen tali penekek ring ; anggan beli kelawan idewa , adi ;

TUSING  DADI  ADI PELIH

Ri-paiketan pawiwahan beli kelawan idewa ; sane idih beli ; tusing pesan dados pelih me-laksana ; yaning adi ngawe iwang , napi penados-nyane ?

INDIK  NGAMBEL  BRATA  ISTRI

Pemekas ; rikalaning adi ngambel bebratan sang rumaga istri ;

MANGDE  YUKTI  SAKING  TUHU

Mangdane yukti ; adi nyukserahang angga ring anggan beli – adi ; beli sane ngelah -  beli ; adi sane madruwe  ; senama adi kelawan beli ; Jaratkaru ;

KAGET  WENTEN ADI  IWANG

di-pet prade wenten benjang pungkur , adi pelih melaksana ;

AMPURAYANG  ANGGAN  BELI

Sampunang adi mepangenan , boyo beli duka ; beli banget nunas sinampura ;

JANTEN  SUWUD

MAPIKUREN  PACANG  PALAS

asiki adi pelih ; janten putus jatu-karman beli tekening adi ; palas beli mapikuren ; keto sumpah beli tekening dewek beline adi , elingang nto adi ;

 

GINADA  ; 8A,8I,8A,8U,8A,4I,8A

38. JARATKARU  NGERANA-SIKA

Cinarita mangke Sang Jaratkaru , angeruwat kasmalaning Diah Nagini , asila pened padmasana – namaskuru yogo-ne kagelarang olih Ida ;

NGUNTAB  SAMI  DEWA-DEWI

Sinambi metu puja wedha – mantra pengaradan prewateking dewa-dewi , kesaksi dening SH.Agni , wus amor-ring kukus harum ;

MANUNGGALANG  SAPTA  CAKRA

Nunggil-akna sapta cakra , amuter cakra sagilingan ; mawit sakeng muladara cakrane –kantos matunggilan ring ajnya cakra ; urip kundalini yoga ;

MUDRA  DASA SIWA  PUTUS

Tan sah juga karuntutin antuk mudra catur dasa siwa , ida mapregayan SH. Ciwa sekala , saka wenang –saka buat –saka weruh Sang Brahmana Jaratkaru

NGUCAP  JAPA  KAWISESAN

Mecihna sang rumaga wisesa ; metu upamsu mantra ; ida angucap pengelukatan Gni-sara , umijil-aken tirtha pancaka , sidi , mandi – sakti ;

TENGAH  WENGI

METATAKAN  PADANG  KUSA

Linggih peyogan idane metatakan antuk padang kusa satus kutus kwehnia , taler kemargiang ; rikalaning tenge tepet galah sandya ; tengahing dalu ;

 GINADA  ; 8A,8I,8A,8U,8A,4I,8A

39. KATON  NGENDIH  CIWA-DWARA

Riwus sregep putus peyogan ida Sang Brahmana Jaratkaru ; kagiat katon teja dahat dumilah – pekebyah-byah ring siwa-dwaran Idane

KADI  BIANG-LALAH  MANJING

Nyalantara lumujug agni  Gandari - teja warna-warni , kadining biang-lalah ;

NUMUS MARING  WYOMANTARA

Metu saking siwadwaran Ida-ne ; ageng aluhur ; numus maring wyomantara

SWARAN  LANGIT KERAG-KERUG

Kagiat ramya gumuruh ikang ambara ; saksat kadi gumine kerubuhan langit

TATIT  KREBEK  TAN PEGATAN

Tan sah juga ; kerebek tatite , metalutan tan rerenan ;

MEDAL GNI

SAKING  TANGAN  MAKA  RWA

Malih sakeng panin idane kiwa-tengen ; metu kukus gandaning hrum , katon agni angabar-abar ; samangkana peyogan Ida sang rumaga wisesa ;

GINADA  ; 8A,8I,8A,8U,8A,4I,8A

40.   SAKING CANGKEM  METU  TIRTHA

Panelas ikanang yogan sang wiku ; lumaris - umijil muncrat mumbul tirtha maha pawitra ,  saking cangkem Ida ;  Sang Brahmana Jaratkaru

MENYIRATIN  SANG  NAGINI

Tirtha pancake pawitrane punika , raris nibenin anggan sang Naga Nagini ; angelukat angeruwat , anyapuh-aken kang sarwaning mala papa petaka ;

DADOS  METU  SALIN  RUPA

Kagiat nyelewedi asalin panji , nyuti rupa Sang Naga Nagini , sida mewali ring rupan-te kadi-ning nguni ; dados anak istri luwih tur ayu mautama  ;

JARATKARU  ISTRI  AYU

Linebar wus puput peyogan Ida Sang Wiku ; raris ida ngandika alus manis ; uduh adi-adi sang ratna ayu Jaratkaru istri , sarin bungan beline –anggan idewane adi ;

KADIH  RATIH  NYALANTARA

Dong kene luwih prebawan idewane adi ; boyo beli mamuji sikian adine ; angob beli ngantenang ; tulya sanghyang Ratih nyalantara ring arep beline-adi

KULIT  KUNING

MAGELOHAN  BANGKYANG RENGKYANG

Uduh adi ; minabang beli ; maserot ulung i-semut adi - kimud tekening kulit adine sane melenyig  , alus turin belig ; bangkyang adine ; acekuk gondo layu.

GINADA  ; 8A,8I,8A,8U,8A,4I,8A

41. RAMBUT  PANJANG  NYAPUH  JAGAT

Adi sang ayu ; bangyang beli sane mayasin - nyumpangang  sekar ring rambut adine ; sane panjang  nyapuh jagat ; adi ;

SURYA  CELING  SUSU  NYANGKIH

Napi malih rikala idewa nyeledet  anggan beline ; rumasa kadi ngantenang manik gni anggan beli-ne adi  , inargamayang beli ; kimud kantos ulung meglebug  ya-i-nyuh danta ; ajerih ngatonang keluwihan susun idewane ;

LUWIH  BAWA  TAN-PE  CEDA

Beli sane nuwenang idewa ; beli patut muji , beli juga patut nyeda , nanging yukti utama pisan bawan adine embas iriki merabi kelawan beli ;

 

MASEMITA  NUDUT  KAYUN

Banggyang dumun panelas kayun beline , ngajum anggan idewane ; sayang ; semitan idewane tulya kadi juruh madu ; rumasa dot pisan beli nyicipin adi

PENGADEG-NYA  LANGSING  LANJAR

Napi malih pengadeg adine ; langsing lanjar ; cokor tulya belingan padi ,

LAMBE  TIPIS

UNTUN-NYANE   WAJA  PETAK

Untun adine saksat waja petak perigi manik , mesibeh raris antuk lambe tipis-masemu bang , sira sane ten buduh dot ngerasayang , adi ;

SEMARANDANA  ; 8I,8A,8O,8A,7A,8U,8A

42. UDUH  JARATKARU   ADI
sepuput masilih asih , ngelantur  sang  Brahmana  mangandika ring rabin idane ; uduh adi rabin beli - sang jegeg idewa – adi ;

RASA  LIPUT  KESEMARAN

Rumasa keliputan gana anggan beli , dong tumben jani beli buduh kesemaran , abin beli adi abin ; usap-usapin beli adi ;

MENGATONANG  ANGGAN  DEWO

Menawi sampun sh. Samara meyang ring sikian beli ; yaning adi satmaka i-sekar miyik beli i-tamulilingan ;  don pisan beli ngisep sari ; adi ;

JALAN  JANI   MAPI-DAB-DAB

Uduh adi ; sayaga   ; ngiring maprewerthi nitenin pacang nunggilang samara  adi , patut makedas-kedas dumun ;  sap-sapin peturone dumun adi ;

 

MATUNGGILAN  SARIRA

Gelek-gelek beli adi , rumasa kadi bedak sugunin anggan beline adi ;

NYEMBAH  RIHIN  RING LELUHUR

Sedurung beli kelawan adi nunggilang sarira , ngiring sembah baktine margiang dumun , mangde sweca ida Sh.Purusa Predana manugraha ;

MANGDE  WENTEN  SANG SUPUTRA

Tunggilang kayun idewane ; pengaptine lamakane sida metu suputra mautama

SEMARANDANA  ; 8I,8A,8O,8A,7A,8U,8A

43. SEDURUNGE  KEKAWITIN

Nanging adi sang jege idewa , mangde patut swadarmaning masenggama , ngiring alon-alon dumun adi ; adeng-adeng malu adi ;

KEMO  ADI  MAKERAMAS

Pinih rihin ; byokalane  margiang dumun , keramasin anggan idewane ;

ANTUK  DAUN PUCUK  NGUDA

Durusang adi ; niki daun pucuk rejunane sane nguda anggen  adi ;

MESIRAM  TOYO KUMKUMAN

Siramang ragan idewane , jangkepin antuk toyo kumkuman , mangde miyik ngalub pawetuan anake alit riwekas ;

MAGELANG  ANTUK  BENANG

Sewus punika , eda adi ngesap benang tridatune gelangang ring tangan idewane ; utpeti-stiti-prelinane mangde sih , ngemit ngempu manik garbane

MEHIAS  TURIN  MELULUR

Patut idewa mapayas , sumpangang sekar kumudane , lulurin anggan idewa-ne adi ; riwekas suputrane mangde-je  jegeg  bagus , adi ;

MEBIJA  TOYO  CENDANA

Raris ; unggahang bija toyo cendanane ring selaning lelatan idewane adi , satmaka nemu purusa predana Ang kelawan Ah-kara , mamurti dados Om

SEMARANDANA  ; 8I,8A,8O,8A,7A,8U,8A

44.  NGIRING  ADI  MANJING  MANGKIN

Singgih adi ayu ; wireh sampun puput prawertin idewane ; ngiring mangkin manjing ring peturon ; adi ;

MARING  GENAH PAMEREMAN

Sayang beli adi ; dini negak nampekin beli adi , sampunang kimud , adi
 

ALON-ALON  DO KADRUPON

Sedurunge melaksana ; elingang pisan piteket beline sane mangkin , indik bebratan sang angelaraken senggama ; mangde manut kecaping aji ;

ANGKIHANE  YA  DAB-DABANG

Pinih ajeng pisan ; tusing dadi runtag , dab-dabang angkihane , pranayamane margiang idewa , apang presidha tenang , kalem turin alep , keto adi ;

EDA NGIDEM EDA RUNTAG

Kaping kalih ; tan wenang angeliyep matan-ta ; tusing dadi adi ngidem , mangde nenten peceng utawi buta okane embas riwekasan ;

EDA NYEMU  EDA UYUT

Kaping tiga ; tusing dadi taler idewa mesemita tan rahayu , twara dadi uyut sawireh rahasya  dahat ; twara dados wenten anake manggihin ;

APANG  YUKTI  SALING  ARSA

Selanturnyane adi ; mangde yukti saling arsa saling ledang , saling kesemaran ; nika sane patut elingan idewa  , ngiring adi , beli pacang meceluban ring taman idewane sane mangkin   ;

GINADA  ; 8A,8I,8A,8U,8A,4I,8A

45.KAGET  SAMPUN IDA  NGIDAM

punggel ikanang carita ; tan kewarnanen senggmaning sang jaratkaru , kagiat sampun mangkin ngarempini sang Jaratkaru istri ;

MENGIDAMANG  SEKAR  MIYIK

Sekadi tawah yukti sane keidamang olih Ida istri ; sami sekancanin sekar sane hrum turin miyik-niyik ;

SEKAR  SANDAT  LAN  CEPAKA

Minkadinnyane ; ida ngidamang sekar sandat – sekar cepaka

SEKAR  TUNJUNG  SEKAR  JEPUN

Tyos den asapunika ; taler minerihang sekar tunjung lan sekar jepun

NGIAS  ANGGA  SE-RAHINA

Sabran duina ida istri ngias angga , setata mepayas masumpang sekar miyik ;

MATUR   BAKTI

SIANG  DALU  RING  BETHARA

Sesampune puput mehias sabran rahina ; tan pegatan ida istri ngrastiti bakti ring para leluhur lan Ida Sh.Widhi Wasa ;

GINADA  ; 8A,8I,8A,8U,8A,4I,8A

46.KALA  DINA  RING  PURNAMA

Sampun puput matur sembah Ida sang istri ring rahina purnama

NUJU  BUDA  LAN UMANIS

Rahina Buda , panca-warania Umanis , sapunapi selanturnyane ?

KAGET  NGALAM-NGALAM  IDA

Kaget nembe Ida Brahmana Jaratkaru ngalam-ngalam sang istri-sekadi manying masilih asih ; kesaksi dening sanghyang sasih ;

UDUH  ADI  JARATKARU

Uduh adi ratnan beli ; jaratkaru sane  sayangang beli ;

RASA  BELI  ARIP  PISAN

Dong dadi kene tumben jani kiap beline ngelintang adi ; cihna napi niki adi

MAI  ADI

ABIN  BELI  DIPABINAN

Meriki adi ; nampekin anggan beline – abin beli ring pabinan idewane adi ;

GINADA  ; 8A,8I,8A,8U,8A,4I,8A

47. UDUH  ADI-ADI  SAYANG

Uduh adi ayu sang Jaratkaru ; rabin beli-ne sane saying

RASA  BAGYA  PISAN  BELI

Dahating bagya pisan pikayunan beli-ne adi , sampun  medaging manut ring pengapti beli kelawan adi , mangde sida maderbe putra ;

MENYANTOSANG  SANG  SUPUTRA

Nika sane ngawinang rasa wareg tan peneda anggan beli-ne adi  , menawi tan kasuwen ida i-anak pacang embas adi ;

SANE WENTEN  MARING  WADUK

Kerasa Sekadi kerawuhin i-bulan purnama rikalaning wengi , keto idep  beline

BANGET  BELI NYUKSEMAYANG

Banget pisan Sukman beli tekening idewa – rasa tan sida keucapang malih

 

NGIRING  ADI

JANTOS-JANTOS  JAN JANTOSANG

Ledang je ngiring menyantosang sepemedal putrane adi , ya-ta lanang yadin istri ; tan wenten prebedannyane , pateh manah beline adi ;

GINADA  ; 8A,8I,8A,8U,8A,4I,8A

48. IDA  DANE  PAMIARSA

Mantuk ring para pamiarsa sinareng sami , sane subaktinin titiyang ;

TITIYANG SEKA  SANTHI  ALIT

Mangkin ngiring punggel kang carita Jaratkaru , titiyang puniki ; i-dseka santhi kantun saksat rare , sane wawu melajah tindak-tindak

WAWU  IBI TITIYANG LEKAD

Indik yusa rumasat wawu rahina dibi titiyang emas , janten sampun durung presida ngentegang raga , napi malih sane tyosan ;

NANGING PONGAH  NGUNJAR PUPUH

Nanging ulihan pongah jwari titiyange nguncarang sekar alit , gaal-gaal kadi i-paksi gagak ; nyihnayang jeleke pedidi , ngomongang beloge pedidi ;

 

AMPURAYANG  BANGET  PISAN

Nika-te mahawinan banget titiyang nunas agung sinampura , mangde sampunang ngemenggahang doleg kayun – ring para pamiragi sinareng sami

TAN  MINTULIN

DAGING  KAYUN  SANG PANGRENGE

Yan inargamayang titiyang ; aturan pisuguh titiyang , melarapan tembang lan pengartos ; waluya kadi jangan tan-pe tasik ; nyem leteg ;

GINADA  ; 8A,8I,8A,8U,8A,4I,8A

49.                      TITIYANG  NUNAS  MANGDE LEDANG

Singgih para sang wagmi ; sedurung titiyang metilar saking ayah-ayah titiyange iriki ; tunas titiyang keledangan ida dane sinareng sami ;

IDA  DANE  MANYULUHIN 

Mangde sweca memica sundih teja mautama , anggen titiyang nyuluhin dewek titiyange , melajahang angga , mangde nenten pati kaplag-pati kaplug ;

WIREH  TITIYANG  KAPETENGAN

Rumasat titiyang kaliput dening kapetengan , sire-men tunasin titiyang penuntun , wantah ida-dane sang pangrenge – sang widagda aji ;

APANG TITIYANG  TAN  KETANJUNG

Dumogi-je wit sangkaning paswecan ida dane sinareng sami , panggih titiyang raris marga agung   galang apadang , kantos uning titiyang lubukan sane sujati 

NENTEN  BINGUNG  NGENTAP  MARGA

Asapunika banget pengaptin titiyang , lamakane sida ngentap marga , ma pupuh tembang yadin artos ; manut ring uger-uger sekar-alit ;

NENTEN PALING 

NGUNGSI  UMAH SWANG-SWANG

Sekala kelawaning sekala , ledang ; aksamayang lan ampurayang , titiyang pamit  mewali ring genah swang-swang , dumogi dirgahayu labda karya ,

OM SANTHI-SANTHI-SANTHI ; OM